Senter for framifrå utdanning

Nasjonalt organ for kvalitet i utdanninga (NOKUT) har gitt status som Senter for framifrå utdanning til Centre for Professional Learning in Teacher Education (ProTEd) ved Universitetet i Oslo, i samarbeid med Universitetet i Tromsø. Senteret skal spreie kunnskap og erfaringar av verdi for utvikling av god lærarutdanning i Noreg.

- Det er solide lærarutdanningsmiljø som inngår i det nye senteret.Dei har dokumentert høg kvalitet i noverande utdanning og har gode planar for vidareutvikling og innovasjon i utdanninga i tett samarbeid med partnerskular. Eg har store forventningar til denne etableringa, seier statsråd for forsking og høgare utdanning Tora Aasland i ei pressemelding.

- Eit slikt senter kan gje utdanningsforskinga både høgare status og meir meksemd innanfor universitetsmiljøa. Det er positivt at Universitetet i Oslo, som har lange tradisjonar for utdanning av lektorar, får eit hovudansvar for det nye senteret. Eg vonar dette kan auke intereressen for skole og utdanning, både blant forskarar og studentar. Norsk skole og pedagogikk har i høg grad vore ideologistyrd, og vi treng meir forskingsbasert kunnskap, seier leiar i Norsk Lektorlag, Gro Elisabeth Paulsen.

Regjeringa har oppretta ordninga med Sentre for framifrå utdanning (SFU) for å stimulere til utvikling av framifrå kvalitet i høgare utdanning og for å gjere synleg at undervisning og forsking er likestilte oppgåver for universitet og høgskular.Senteret får får fire millionar kronar per år i fem år. Ordninga blir administrert av NOKUT.

–Det er gjort eit grundig arbeid med å utarbeide ein modell for SFU-ordninga som no skal prøvast ut med det nye senteret. Eg er nøgd med at det er vist stor interesse blant universitet og høgskular for ordninga og at det var sterke søkjarar i konkurransen. Eg vil arbeide for at ei utvida og permanent ordning kan kunngjerast så raskt som mogeleg, seier statsråd Tora Aasland.